ڈرامہ مینٹل پیس 6 دسمبر سے نیشنل اکیڈمی آف پرفارمنگ آرٹس میں پیش کیا جائے گا

کرشن چندرکے ناول سے ماخوذ ڈرامہ مینٹل پیس 6دسمبرسے نیشنل اکیڈمی آف پرفارمنگ آرٹس میں پیش کیاجائےگا۔

نیشنل اکیڈمی آف پرفارمنگ آرٹس(ناپا)کے سی ای اوجنید زبیری نے تھیٹرپلے مینٹل پیس کے ڈائریکٹراورکاسٹ کے ہمراہ پریس کانفرنس کی،جس میں ان کا کہناتھا کہ مینٹل پیس ڈرامے کے رائٹر،ڈائریکٹرناپا کے گریجویٹ ذکی اللہ خان ہیں،ڈرامہ 6سے10دسمبرکے دوران ضیا محی الدین تھیٹرمیں پیش کیاجائےگا۔

ان کا کہناتھا کہ نیشنل اکیڈمی آف پرفارمنگ آرٹس نے ہمیشہ نوجوان ٹیلنٹ کی حوصلہ افزائی کی ہے،ناپا کے سابق اسٹوڈنٹس کے لکھے ہوئے ڈراموں کو اسٹیج کرنا اسی جذبے کا حصہ ہے۔

جنید زبیری کا مزید کہناتھا کہ فنون لطیفہ کا یہ تسلسل اسی اندازمیں سن 2024میں بھی برقراررکھاجائےگا،اس تناظرمیں نئے رائٹرکو خاص فوقیت دی جارہی ہے کہ وہ ان کا انتخاب کیاجائے،جہاں تیکنیکی مہارت درکارہو توان کی حوصلہ افزائی بھی کی جائے تاکہ وہ اپنے اچھے موضوعات پرمبنی ڈراموں کو ناپا کے پلیٹ فارم سے پیش کرسکیں۔

ڈرامہ مینٹل پیس کے ڈائریکٹرذکی اللہ کا اس موقع پرکہناتھاکہ تھیٹرپلے کرشن چندر کے ناول کی ایک کہانی سے اخذکیاگیا ہے،جس کا کل دورانیہ ڈیڑھ گھنٹہ ہے۔

ان کا مزید کہناتھا کہ کاسٹیوم ڈرامہ ہونے کی وجہ سے فنکاروں کے لباس اورپرفارمنس کے دورن لب ولہجے کے لیے کافی محنت کی گئی ہے،کہانی ایک ایسے فرد کے گردگھومتی ہے،جو یکے بعد دیگرے چارشادیاں کرلیتاہے،اس کے بعد اس فرد کی زندگی کے پیچ وخم کی شروعات ہوتی ہے،پریس کانفرنس کے آخرمیں کاسٹ میں شامل فنکاروں نے کچھ مناظرکو پرفارم کیا۔