وزیراعظم نے چین کے تاریخی مقام ٹیراکوٹا واریئرز میوزیم کا دورہ کیا، چینی کاریگروں کی مہارت کی تعریف

وزیراعظم محمد شہباز شریف نے پاکستانی وفد کے ہمراہ ہفتہ کو چین کے تاریخی مقام ٹیراکوٹا واریرز میوزیم کا دورہ کیا۔ یہ دورہ چینی صدر شی جن پنگ کی طرف سے وزیر اعظم کو اپنے آبائی شہر ژیان میں میوزیم کا دورہ کرنے کی دعوت کا حصہ تھا۔

دورے کے دوران وزیراعظم اور وفد کو تاریخی ورثے کے تحفظ اور بحالی اور سیاحت کے فروغ پر بریفنگ دی گئی۔ وزیراعظم شہباز شریف جو چین کے 5 روزہ سرکاری دورے پر ہیں، نے میوزیم کے مختلف حصوں کا دورہ کیا اور چین کے قدیم ورثے کی خوبصورتی اور چینی کاریگروں کی مہارت کو سراہا۔ "عظیم قومیں چینیوں کی طرح اپنے تاریخی اثاثوں کی حفاظت اور دیکھ بھال کرتی ہیں”۔

انہوں نے مزید کہا کہ 200 قبل مسیح کے چینی کاریگروں کی مہارت قابل تعریف تھی۔ وزیراعظم نے تاریخی مقام کے تحفظ اور بحالی میں چینی حکومت کی کوششوں کو بھی سراہتے ہوئے کہا کہ پاکستان تاریخی اور ثقافتی ورثے سے بھی مالا مال ہے۔ انہوں نے کہا کہ حکومت اپنے تاریخی مقامات کو سیاحتی مقامات کے طور پر بحال اور فروغ دے گی۔

انہوں نے صدر شی جن پنگ کو میوزیم کا دورہ کرنے کی دعوت دینے پر بھی شکریہ ادا کیا۔ وفاقی وزراء خواجہ محمد آصف، احسن اقبال، محمد اورنگزیب، عطاء اللہ تارڑ، ڈاکٹر مصدق ملک، سردار اویس خان لغاری، رانا تنویر حسین بھی دورے کے دوران وزیراعظم کے ہمراہ تھے۔