نیوزی لینڈ کے ساتھ 5 ٹی 20 میچوں کی سیریز کے لیے سلیکشن کمیٹی کا اجلاس 13 دسمبر کو ہوگا

قومی ٹیم کے دورہ نیوزی لینڈ کیلئے وہاب ریاض کی سربراہی میں نیشنل مینز سلیکشن کمیٹی کا اجلاس 13 دسمبر کو لاہور میں ہوگا۔

اجلاس میں  نیوزی لینڈ میں ہونے والی پانچ میچوں کی ٹی ٹوئنٹی سیریز کے حوالے سے سلیکشن کے معاملات پر غور کیا جائے گا۔

سلیکشن کمیٹی کراچی میں جاری نیشنل ٹی ٹوئنٹی کپ 24-2023 کی پرفارمنسز پر غور کرے گی۔

میڈیا سے گفتگو کرتے ہوئے چیف سلیکٹر وہاب ریاض نے  کہا کہ پچھلے 25 سال سے آسٹریلیا میں ایک ٹیسٹ میچ بھی نہیں جیتے،اس دفعہ امید یہ ریکارڈ ختم ہوگا اور دورہ آسٹریلیا پر ٹیم اچھی کرکٹ کھیلے گی۔

وہاب ریاض نے کہا کہ ورلڈکپ سے قبل ہر کھلاڑی کا متبادل تیار کرنے کی کوشش کریں گے تاکہ نسیم شاہ والی صورتحال پھر نہ بنے۔نسیم شاہ مکمل فٹ ہونے کے بعد ٹیم کا حصہ ہوں گے۔

ٹی ٹوئنٹی کے ممکنہ کھلاڑیوں کا تربیتی کیمپ 25 دسمبر سے نیشنل کرکٹ اکیڈمی لاہور میں شروع ہوگا، نیوزی لینڈ کے خلاف T20I سیریز کے لیے حتمی اسکواڈ کا اعلان 2 جنوری 2024 کو متوقع ہے۔ نیوزی لینڈ کے خلاف سیریز 12 جنوری سے شروع ہوگی۔