چین کوفوجی سرگرمیوں پرانتباہ،بیجنگ کے ساتھ تعمیری،مستحکم تعلقات چاہتے ہیں،جی سیون

جی سیون سربراہوں نے چین کو ایشیا پیسفک میں فوجی سرگرمیوں پر خبردار کرتے ہوئے کہا ہے کہ وہ بیجنگ کے ساتھ تعمیری اور مستحکم تعلقات چاہتے ہیں۔

ہیروشیما میں جی سیون ملکوں کے سربراہ اجلاس کے اعلامیہ میں چین کی فوجی اور اقتصادی سرگرمیوں پر خدشات کا ایک پہاڑ کھڑا کیا گیا لیکن دنیا کی دوسری بڑی معیشت اور مغربی دنیا کے درمیان تناؤ کو بھڑکانے سے بچنے اور تعاون کا دروازہ بھی کھلا رکھنے کی کوشش کی گئی۔

جی سیون اعلامیہ میں کہا گیا کہ ہم چین کے ساتھ تعمیری اور مستحکم تعلقات رکھنے کے لیے تیار ہیں، ہم چین کے ساتھ کھلے دل کے ساتھ روابط رکھنے اور چین کے ساتھ براہ راست تحفظات شیئر کرنے کی اہمیت سے آگاہ ہیں، ہماری پالیسیوں کا نکتہ نظر چین کو نقصان پہنچانا نہیں اور نہ ہی ہم چین کی اقتصادی پیشرفت کو روکنا چاہتے ہیں، ہم چین کے ساتھ اقتصادی مقاطعہ بھی نہیں چاہتے۔

جی سیون گروپ نے بحیرہ جنوبی چین میں چین کی فوجی سرگرمیوں پر خبردار کرتے ہوئے اس بات کو دہرایا کہ آبنائے تائیوان میں امن اور استحکام عالمی سلامتی کے لیے ضروری ہے۔

جی سیون نے چین پر زور دیا کہ وہ روس کو فوجی جارحیت سے روکنے،اور اسے یوکرین سے فوری اور غیر مشروط پر فوج واپس نکالنے کے لیے اپنا اثر و رسوخ استعمال کرے۔