جس نے سستی روٹی بیچنی ہے ڈی سی آفس میں تنور لگائے، راولپنڈی کے تاجروں کی احتجاج کی دھمکی

صدر آل پاکستان انجمن تاجران کاشف چوہدری اور نانبائی ایسوسی ایشن کےعہدیداروں کا کہنا ہے کہ حکومت آٹے کی بوری دو سو روپے کم کرکے روٹی دس روپے کمی کیساتھ فروخت کرانا چاہتی ہے۔ نانبائی ایسوسی ایشن کے صدر اور نائب صدر کو اغواء کیا گیا ان کی بازیابی تک مزاکرات نہیں ہونگے۔ پہلے مرحلے میں احتجاج اور دوسرے میں ہڑتال پر مجبور ہونگے۔جس نے سستی روٹی دینی ہے وہ ڈی سی آفس میں تندور لگائے۔

راولپنڈی پریس کلب میں ہنگامی پریس کانفرنس سے خطاب میں صدر آل پاکستان انجمن تاجران کاشف چوہدری نے کہا کہ اگر ایسے اغوا ہوتے رہے تو جمہوریت کے دعوے دار کس منہ سے عوام کی ترجمانی کریں گے۔ریاست جواب دینے سے قاصر ہے اور 18 گھںٹے گزر گئے ہیں۔کوئی بتانے کو تیار نہیں کہ ان نمائندوں کو کچے کے ڈاکو اٹھا کر لے گئے یا پکے کے ڈاکو؟

کاشف چوہدری نے کہا کہ مطالبہ کرتا ہوں فوری طور پر شفیق قریشی اور سردار مشتاق کے اغوا کا مقدمہ درج کیا جائے۔ عدم بازیابی کی صورت میں احتجاج اور شٹرڈاون کریں گے اور ملک کی تاجر تنظیمیں انکے ساتھ کھڑی پوں گی۔

خورشید قریشی جنرل سیکرٹری نان بائی ایسوسی ایشن راولپنڈی نے کہا کہ صدر شفیق قریشی اور سینئر نائب صدر سردار شفیق کہاں ہیں؟ کچھ پتا نہیں ہے، انتظامیہ ہمارا موقف بھی سنے،اگر عہدیداروں کو شام تک رہا نہ کیا گیا تو احتجاج کی جانب جائیں گے۔

سجاد عباسی صدر کیپیٹل نان بائی ایسوسی ایشن اسلام آباد نے کہا کہ حکومت پنجاب نے رات کی تاریکی میں بند کمروں میں بیٹھ کر روٹی کی قیمت کا نوٹیفیکیشن جاری کیا۔ حکومت پنجاب کو وارننگ ہے کہ نمائندگان کی بازیابی تک بات نہیں ہوگی۔ مذاکرات صرف برابری کی سطح پر ہوں گے۔ حکومت بنیادی چیزوں کو کنٹرول کرے، بجلی گیس کی قیمتیں کہاں پہنچ گئی ہے۔ریاست نے اسطرح دبوچنے،دباو میں لانے کی کوشش کی تو ملک بھر کی نان بائی سڑکوں پر ہوں گے۔

سجاد عباسی نے کہا کہ جس نے سستی روٹی دینی ہے وہ ڈی سی افس میں تندور میں لگائے۔

انہوں نے اپیل کی کہ آرمی چیف، چیف جسٹس، وزیر اعظم اور وزیر اعلی ان کے نمائندگان کی بازیابی کیلئے اقدامات کریں۔