کسٹمز انٹیلی جنس کی ملک بھر میں کارروائیاں، 30 کروڑ سے زائد مالیت کے سمگل شدہ سگریٹ ضبط کر لیے

کسٹم  حکام نے ملک  میں سمگل ہونے والے سگریٹ پر کریک ڈاؤن کرتے ہوئے 10 دن کے دوران 30 کروڑسے زائد مالیت سمگل شدہ سگریٹ ضبط کر لیے۔

چیئرمین ایف بی آر،  عاصم احمد کی رہنمائی اور ڈائریکٹر جنرل کسٹمز انٹیلی جنس، جناب فیض احمد چدھڑ کی براہ راست نگرانی میں، کسٹمز انٹیلی جنس  گزشتہ 10 روز میں ملک گیر آپریشنز کے دوران  30 کروڑ مالیت سے زائد اسمگل شدہ سگریٹ ضبط کر لئے ہیں۔

کسٹمز انٹیلی جنس   نے  سب سے بڑی کارروائی بلوچستان میں کی، غیرملکی سگریٹس کی بڑی کھیپ پکڑی گئی، حکام کے مطابق   بلوچستان سے 42   لاکھ  سے زائد اسمگل شدہ غیر ملکی سگریٹ کی ڈبیاں برآمد کی گئیں، کسٹمز کے مطابق ان کی مالیت 114 کروڑ روپے سے زائد بنتی ہے۔

کسٹم کی جانب سے صوبہ سندھ میں 8 چھاپے مارے گئے اور ان چھاپوں میں کے غیرملکی سگریٹس کی بڑی کھیپ برآمد کی گئی، کسٹم حکام کے مطابق 14 لاکھ سگریٹ کی ڈبیاں برآمد کی گئیں،جن کی مالیت تقریباً 70 کروڑ  بنتی ہے۔

اسی طرح، پنجاب میں انٹیلی جنس کی بنیاد پر  کی گئی مختلف کارروائیوں کے دوران13 لاکھ اسمگل شدہ غیر ملکی سگریٹ کی ڈبیاں برآمد کیں جن کی مالیت 75 کروڑ  سے زائد بتائی جارہی ہے۔

کے پی میں بھی کسٹم انٹیلی جنس نے بڑی کارروائی کی ،کسٹم حکام نے ساڑھے 11 لاکھ سے زائد سگریٹ کی ڈبیاں برآمد کیں جن کی مالیت  تقریباً 44 کروڑ بنتی ہے۔

،ڈی جی کسٹمزانٹیلی جنس  کے مطابق سگریٹ کی اسمگلنگ کیخلاف کراچی ،گوادر، پشاور اورراولپنڈی میں چھاپے مارے گئے،حیدرآباد، ملتان ، لاہور  اور کوئٹہ میں بھی کریک ڈاؤن کیاگیا، چیئرمین ایف بی آرعاصم احمد کی جانب سے کسٹمزانٹیلی جنس کی کارروائیوں کو سراہا گیا۔