لائف سٹائل
کراچی کا معروف کیپری سینما جمعرات تک بند، جمعہ کو دو فلموں کی نمائش ہوگی
کراچی کا واحد سنگل اسکرین سینما کیپری تیکنیکی وجوہات کے سبب جمعرات تک بند رہےگا،جمعے کو ٹام کروز کی بلاک بسٹرفلم مشن امپوسیبل اورپاکستانی فلم جون کیپری پرنمائش پذیر ہونگی۔
بابائے قوم کے نام سے منسوب ایم اے جناح روڈ کے سنگم پرواقع شہر کے مشہورسینما گھر کیپری کے حوالے سے سوشل میڈیا پرسرگرم افواہوں کی سینما انتظامیہ نے نفی کی ہے۔
کیپری سینما کے جنرل مینیجرعزیزخٹک کے مطابق کچھ تیکنیکی وجوہات کی بنا پرعید قرباں کے بعد اچانک مشینری میں پیدا ہونے والی تیکنیکی خرابی کے سبب سینما مشینری کی مینٹینس انتہائی ناگزیر تھی،جس کی وجہ سے آج(پیر)سے جمعرات تک کیپری سینما کو بند رکھا جارہاہے،تاہم جمعے کو ٹام کروز کی فلم مشن امپوسیبل اورڈائریکٹربابرعلی کی پاکستانی جون سے سینما ہال کو دوبارہ کھولا جارہا ہے،ان دونوں فلموں کے شوز فلم بینوں کودکھائے جائینگے۔
کیپری سینما انتظامیہ نے سوشل میڈیا پرچلنے والی خبروں کی سختی سے تردید کی ہے،جس میں یہ تاثر دیا جارہا ہے کہ کیپری سینما کو بند کیا جارہا ہے،سینما انتظامیہ کا کہنا ہے کہ کیپری کو بند کرنے کی خبریں بے بنیاد ہیں،یہ کراچی کے فلم بینوں کے لیے واحد سستی ترین تفریح گاہ ہے،جہاں آج بھی 200روپے کا ٹکٹ دستیاب ہےجبکہ مہنگا ٹکٹ 600 روپےکا ہے۔