حکومت پاکستان کے خدشات کو سمجھنے کے لیے کام کر رہے ہیں، ایکس کی وضاحت

پاکستان میں فروری سے تعطل کے شکار سوشل میڈیا پلیٹ فارم ایکس (سابق ٹویٹر) نے بدہ کے روز پاکستانی وزارتِ داخلہ کی جانب سے اسلام آباد ہائیکورٹ میں جمع کروائی جانے والی تحریری رپورٹ پر بیان جاری کیا ہے۔

سوشل میڈیا پلیٹ فارم ایکس کی جانب سے اپنے ہی پلیٹ فارم پر جاری ہونے والے بیان میں کہا گیا ہے کہ ’وہ حکومتِ پاکستان کے خدشات کو سمجھنے‘ کے لئے حکومت کے ساتھ مل کر کام کو جاری رکھے ہوئے ہے۔‘

We continue to work with the Pakistani Government to understand their concerns.

— Global Government Affairs (@GlobalAffairs) April 17, 2024

یہ مختصر بیان ایکس کے گلوبل گورنمنٹ افیئرز نے بدھ کی رات دیر گئے جاری کیا، جو پاکستان میں اس سوشل میڈیا پلٹ فارم کی بندش یا اس تک رسائی میں صارفین کو پیش آنے والی مُشکلات کے بعد سامنے آنے والا پہلا تبصرہ ہے۔

واضح رہے کہ اس سے قبل بدھ کے روز پاکستانی وزارتِ داخلہ کی جانب سے سوشل میڈیا پلیٹ فارم ایکس کی بندش کے خلاف درخواست پر رپورٹ اسلام آباد ہائیکورٹ میں جمع کرواتے ہوئے درخواست کو خارج کرنے کی استدعا کی تھی۔

وزارت داخلہ نے اسلام آباد ہائیکورٹ میں جمع کروائی جانے والی اپنی رپورٹ میں کہا کہ ’ایکس پاکستان میں رجسٹرڈ ہے اور نہ ہی پاکستانی قوانین کی پاسداری کے معاہدے کا شراکت دار جب کہ ایکس نے پلیٹ فارم کے غلط استعمال سے متعلق حکومت پاکستان کے احکامات کی پاسداری بھی نہیں کی، حکومت پاکستان کے احکامات کی پاسداری نہ ہونے پر ایکس پر پابندی لگانا ضروری تھی۔‘